Tve-t Díli, Kuarta-feira (06-03-2024) – Relasiona ho loron internasional ba feto ne’ebe kada tinan mundu tomak Selebra iha loron 08 fulan marsu inklui Timor-Leste.
Nune’e liu husi intervensaun politika Bankada opozisaun Frente Revolusionaria Timor-Leste Independência ( FRETELIN) iha Parlamentu Nasional liu husi deputada Nurima Ribeiro Alkatiri hateten, Disparidade entre jéneru sira preokupante tebes, nune’e Loron Internasional ba Feto, fó-hanoin ita katak presiza fó kbiit, atensaun no prioridade ba feto sira, liu-liu tenki atua hodi reduz taxa dezempregu ne’ebé aas tebes ba feto no ba joven feto sira.
“Iha semana ida ne’e ita sei selebra Loron Mundial Feto nian, loron 8 Marsu. Loron Mundial Feto nu’udar loron ne’ebe mundu tomak inklui Timor-Leste, tinan-tinan, selebra vitoria sira ne’ebe maluk feto sira konsegue atinji ona, maibe nu’udar mos loron atu ita reflete ba dezafiu sira ne’ebe maluk Feto sira sei hasoru. Jovem feto ne’ebe hasoru dezempregu no subemprego barak tebes persentajem bo’ot liu kompara ho mane sira”, Nurima Esplika.
Deputada ne’e esklarese, bainhira Selebra Loron ida ne’e, ho diskursu oin-oin, no buka atu hatais didiak, ita labele haluha mos katak maluk feto no Joven feto sira iha Timor-Leste sei sobrekarga tanba dezigualdade jéneru hasoru diskriminasaun iha merkadu traballu, asesu limitadu ba oportunidade dezenvolvimentu abilidade, feto asume todan bo’ot liu no la proporsional ba responsabilidade doméstika. Fator sira ne’e limita mos potensial ekonomiku ba jovem feto sira, mantem siklu kiak, halo susar liu tan atu hetan emprego diak no dignu.
