Reportajen : Madalena Reis
Tve-t Díli, Sesta-feira ( 08-03-2024) – Prezidente Repúblika José Ramos Horta hateten, Iha Loron Internasionál Feto nian iha tinan 2024, Timor-Leste reforsa ninia kompromisu maka’as atu investe iha empoderamentu feto no labarik-feto sira iha setór hotu-hotu.
“Bainhira ita investe iha feto sira-nia edukasaun, kuidadu saúde, oportunidade ekonómiku no papél lideransa, ita aselera progresu ba sosiedade tomak. Feto ida-ne’ebé iha kbiit boot hasa’e dignidade nia família, nia komunidade no ita-nia nasaun. Mai ita kontinua halakon barreira sira, dezafiu ba estereotipu jéneru no kria mundu ida-ne’ebé hanesan, iha ne’ebé feto ida-idak bele atinji nia potensialidade tomak sein impedimentu”, Dehan Prezidente Repúblika José Ramos Horta, Liu husi Komunikadu ne’ebe Tve-t asesu, Sesta-feira (08-03-2024).
Enkuantu Xefe estadu hato’o Ksolok Loron Internasionál Feto, ba Feto hotu-hotu ne’ebé iha Timor-Leste no iha mundu tomak, ne’ebé nia reziliénsia, determinasaun, no kontribuisaun forma futuru ida-ne’ebé di’ak liu ba ema hotu.
