.Tve-t Dili, Tersa-feira (26-03-2024) – Bankada opozisaun Kmanek Haburas Unidade Nasional (KHUNTO) sujere ba IX Governu Konstitusional atu Kria uluk kondisaun iha Merkadu Sira iha kapital Dili hafoin muda vendedores ba Merkadu ka fatin ne’ebe maka proprio.
Bankada KHUNTO hare katak Politika muda vendedores ba Merkadu hanesan Taibesi, Manleuana no Comoro ne’e Governu percisa hare uluk kondisoes antes muda sira ba fatin refere.
“Vendedores ki’ik sira ne’e rekonhese katak fatin hirak ne’ebe sira okupa dadaun ne’e laos fatin atu faan sasan. Sira hakarak muda ba merkadu hodi buka moris. Maibe merkadu hirak ne’ebe agora iha Díli laran laiha kapasidade naton atu halibur hamutuk vendedores kiik sira hotu ne’ebe loron ba loron laos tun maibe aumenta tan, tanba situasaun ekonomia rai laran, kiak no dezempregu”, Dehan Deputadu Antonio Verdial da Silva Ferreira, (25/03).
Deputadu né afirma, merkadu hirak ne’e barak maka laiha kondisoens no la preparadu atu sai merkadu. Exemplo maka hanesan merkadu Comoro, to’o ohin loron laiha mudansa no vendedores sira kontinua hela iha fatin ne’eba no laiha kondisaun higenia ka sanitasi, no potensialmente bele hamosu konflitu oioin.
Governo agora la iha programa no plano diak atu hadia ekonomia, liu-liu oinsa halakon dezempregu. Hakarak muda vendedores sira, maibe la fo alternativos no kondisoens atu ema buka moris diak liu tan ho dignidade. Governo halo ema povo kiik sira ne’e hanesan inimigu, hanesan ema ne’ebe la iha dignidade.
