Tve-t Dili, Segunda feira (01/04/2024) – Amo Paroco Parokia Santo António Motaél, Guilhermino da Silva dehan, Na’i Jesus kristu terus no mate iha kruz liu loron tolu moris hias fila fali atu salva ema hotu nia sala sai husi moris nakukun ba moris naroman hodi lori ema hotu atu manan salvasaun (premiu) tama ba lalehan ho Na’I Maromak.
Padre Guilhermino dehan, baze fundamenta ba misa kalan sabadu alleluia “SABADO SANTO, TINAN ne’e 2024, JESUS NAZARE NE’EBÉ MATE IHA KRUS MORIS HIAS ONA” ne’ebé sarani sira selebra iha Sexta Feira Santa la’o tuir ona prosesu sira julgamentu iha Judeu nia tribunál. Pilatus halo julgamentu ida ne’ebé iha presaun nia laran, tan povu husu atu nia tenki kondena Jesus no hedi Nia ba Krus.
“Jesus mate duni iha Krus tutun, hafoin ema hatun. Nia i sin maten hodi ba hakoi iha Rate. Nia laiha ona, maibé iha kalan ida ne’e saida maka akontese buat seluk no extraordinariu tebes. Jesus ne’ebé Judeu sira fó terus no mate hodi hakoi nia iha rate moris fali ona. Nia moris hias halakon ona mate Nia kbiit. Ninia moris hias ne’e halo ema hotu hakfodak no fiar iha Nia. Ita bele imajina, se Kristu la moris hias karik hosi mate, ita nia fiar saugate de’it. Se ita la sai hosi ita nia salan sira, ita selebra Paskoa ida ne’e saugate loos. Maibé ita nia hanoin sira ne’e, hanoin leet de’it tan Jesus moris duni ona. Rate mamuk ona no anju sira mós hato’o ona katak nia moris hias tiha ona. Nunee kreda hato’o nia ksolok liu hosi hananu “Haksolok Anjo sira Lalehan hananu, rai klaran haklaken hahi Maksoin,” dehan Padre Guilhermino da Silva iha nia omilia iha misa sábadu Aleluia iha Igreja Motaèl, Dili sábadu kalan (30/3/2024).
Nai Jesus nia mate too moris hikas, lori mensajen haksolok ba iha kalan naroman ne’ebé ita tama. Ita haksolok tan ita Nai Jesus moris fali ona, Nia manan funu. Ita hahi Nia, hawelok Nia hodi fó gloria ba Nai Jesus. Ita haksolok tan Nia manan ona funu hasoru nakukun mate nian.
Rate la’òs final hosi ita nia moris maibé rate nu’udar fatin tranzitu ba ita atu to’o iha Uma Lalehan. Nai Jesus ne’ebé hola Ilas hanesan ita ema, koko ona mate, moris fali ona. Ita hakat liu tiha ita nia hanoin mate nian ne’ebé halo ita laiha esperansa. Ita hader, hamriik hodi foti sae ita nia oin, no ita lao ba oin ho espiritu moris hiaas nian.
Espiritu Paskoa nian ita presiza hatene katak liu tiha nakukun sei mosu naroman, liu tiha terus sei mosu ksolok. Haksolok ba ema Paskoa nia oan sira. Terseiru, Ba Galileia: Nia dehan ba Maria: “Imi ba dehan ba eskolante sira no Pedro, Nia ba uluk liu imi iha Galileia” iha ne’eba imi sei hare Nia hanesan Nia dehan ona”.
Iha kalan ne’e mós hafoin, ha’u husik reflesaun ida ne’e hotu ita sei renova ita nia promessa batizmu nian, ne’ebé uluk ita halo wainhira ita simu batizmu dala uluk iha kreda. Ita renova hodi promete ba Nai atu hakribi salan no fiar iha Nai. Ita hakarak disponivel nafatin no disponivel liutan hala’o ita ida-idak nia knaar tuir Nai Nia hakarak.
Hafoin ita buka rai esperiensia ksolok Paskoa nian iha ita nia moris nu’udar osan mean ne’ebé folin boot bai ta nia moris hodi fahe ho sira seluk ksolok ida ne’e, ksolok domin nian ne’ebé ita simu ona iha Paskoa. Jesus Nazare ne’ebé mate iha Krus moris hias ona. Nia halakon tebes duni ona mate nia kbiit no nakukun na’in nia ukun. Mai ita hotu haksolok hodi hahi Nia ho liafuan Kristu moris hias ona
Entretantu, misa sabadu santu ne’e partisipa mós hosi Primeiru-Ministru Kay Rala Xanana Gusmão ho esntidade no sarani sira hodi lee leitura furak sira kona-ba Na’I Jesus Kristu iha selebrasaun sábadu Aleluia katak, sai hosi nakukun ba naroman, sai hosi mate ba moris, sai hosi sala atu hetan grasa Maromak nian no sai hosi tristeza ba ksolok moris rohan laek.
