Tve-t Dili, 4 Abril 2024 – Prezidente Jose Ramos-Horta hala’o sorumutu regulár ho Xefe Governu, Kay Rala Xanana Gusmão iha Palásiu Prezidensiál. Lider rua ne’e diskute kona-ba asuntu oioin ne’ebé Timor-Leste hasoru dadaun ne’e.
Prezidente Ramos-Horta apresia Primeiru-Ministru hodi ajuda hadi’a fali situasaun kalma iha nasaun ne’e durante Semana Santa tanba situasaun diferente uitoan antes Paskua tanba grupu foin-sa’e balun halo problema iha Dili laran. Relasiona ho ida-ne’e, Primeiru-Ministru fó-hatene ba Prezidente katak governu aprova ona rezolusaun atu estende suspensaun ba atividade arte marsiál sira, la’ós atu fó kastigu ba grupu sira ne’e, maibé tanba estudante balun envolve iha konflitu tanba tensaun entre arte marsiál oin-oin. Maibé, Xefe Governu hateten katak governu planeia atu organiza kompetisaun ba grupu arte marsiál sira hodi haka’as sira muda sira-nia mentalidade ba dalan pozitivu liu.
Preparasaun ba Timor-Leste nia adesaun atu tama ba ASEAN mós iha ajenda. Xanana Gusmão atualiza ba Prezidente kona-ba vizita foin lalais husi Sekretáriu Jerál ASEAN nian no lansamentu programa “Futuru Lider ba ASEAN”atu bele envolve liután foin-sa’e sira. Primeiru-Ministru enkoraja jerasaun foin-sa’e sira iha nasaun ne’e atu envolve iha asaun pozitivu sira ne’ebé bele kontribui ba dezenvolvimentu Timor-Leste nian.
Asuntu globál sira ne’ebé fó impaktu ba rejiaun no asuntu nasionál xave sira seluk mós kobre iha sorumutu ne’e. Ida ne’e inklui diskusaun kona-ba konvidadu importante sira ne’ebé hein katak sei partisipa selebrasaun Independénsia iha Timor-Leste iha loron 20 fulan-maiu tinan ne’e.
Sorumutu regulár entre Prezidente no Primeiru-Ministru permite koordenasaun kona-ba servisu governu nian, seguransa no asuntu hotu-hotu ne’ebé afeta situasaun iha nasaun ne’e.
Média PR/ TVE.
