Tve-t, Dili : Terxa feira (09/04/2024) – Embaixadór Brunei Darussalam iha Timor-Leste, Wan Hadfi Latif, hasoru-malu ho Primeiru-Ministru, Kay Rala Xanana Gusmão hodi atualiza progressu diskusaun tékniku iha área importante tolu ne’ebé mak sei estabelese atu dezenvolve hamutuk iha futuru.
Atualizasaun progressu diskusaun tékniku ne’e bazeia bá identifikasaun no diskusaun inísiu bainhira Prezidente Repúblika José Ramos-Horta hala’o vizita bá Brunei Darussalam iha fulan novembru tinan 2023.
Seitór importante tolu ne’ebé iha ona nível diskusaun tékniku atu avansa bá kooperasaun mak hanesan seitór saúde, mina no gas inklui edukasaun.
“Diskusaun nível tékniku entre Brunei Darussalam ho Timor-Leste la’o hela kona-bá saida mak Timor-Leste presiza iha kooperasaun ida-ne’e. Maibé, iha kontekstu relasaun bilaterál, relasaun entre nasaun rua la’o di’ak tebes liu-liu relasaun entre ami-nia Liurai ho Primeiru Ministru Kay Rala Xanana Gusmão,” Wan Hadfi Latif hateten hafoin hasoru-malu ho Primeiru Ministru Xanana Gusmão iha Palasiu Governu, Segunda (08/04/2024).
Diplomata ne’e kontente tanba Primeiru-Ministru Xanana Gusmão iha vontade boot no promete sei koordena ho ministériu sira hodi ko’alia kona-bá konteúdu diskusaun ida-ne’e ba oin.
Hosi parte Brunei Darussalam nian hein de’it ekipa tékniku Timor Leste nian liu-liu sira ne’ebé sei bá Brunei hodi ko’alia ho kle’an liu tán.
Ligadu ho rekrutamentu bá traballadór Timor-oan sira hodi bá serbisu iha rai-li’ur, reprezentante Brunei iha Timor-Leste ne’e konfirma katak, diskusaun la’o tiha ona entre Embaixada Timor-Leste iha Brunei no ajénsia sira, prossesu ba oin sei hein informasaun detallada molok realiza rekrutamentu
