Tve-t Dili, 8 Abril 2024 – Prezidente Republika Jose Ramos-Horta simu Kick Academy nia na’in Robbie Krasic husi Austrália no emprezáriu Australianu, Stuart Mkojera-Thomson iha Palásiu Prezidensiál. Objetivu husi sorumutuk ne’e mak atu Kick Academy, hanesan organizasaun desportu Austrália nian ida-ne’ebé lidera husi komunidade, fó ekipamentu bola joga nian ba labarik sira ne’ebé ladun iha priviléjiu iha Timor-Leste.
Krasic no Mkojera-Thomson aprezenta ona pakote 20 ne’ebé iha bola, sapatu no meias atu fahe ba labarik sira. Hafoin doasaun, Kick Academy lidera klínika bola ba labarik sira, hodi fó oportunidade ba sira atu aprende abilidade no téknika foun husi treinadór sira husi organizasaun Austrália. Klínika ne’e ninia objetivu mak atu kria ambiente ida-ne’ebé fasilita dezenvolvimentu infantil ba labarik sira liu husi desportu joga bola.
Stuart Mkojera-Thomson, hato’o ninia organizasaun nia dedikasaun ba programa sira ne’ebé lidera husi komunidade ne’ebé uza bola nu’udar instrumentu ba empoderamentu juventude. “Kick Academy planu mós atu fila-fali mai Timor-Leste hodi fó tan bola no hala’o klínika adisionál la’ós de’it foka ba abilidade joga bola, maibé mós ba servisu ekipa, hamutuk, no moris saudavel”, dehan Thomson.
Eventu ne’e subliña esforsu kolaborativu entre Timor-Leste no organizasaun internasionál sira atu promove ambiente ida-ne’ebé kondusivu ba dezenvolvimentu foin-sa’e sira iha nasaun ne’e liuhusi envolvimentu desportu no hakbesik ba komunidade.
Média PR/TVE-T
