Tve-t, Dili : Terxa feira (09/04/2024) – Reprezentante Espesiál Austrália ba Greater Sunrise, Esteve Bracks, hasoru-malu hikas ho Primeiru-Ministru (PM), Kay Rala Xanana Gusmão no Ministru Petróleu no Rekursus Minerais, Francisco da Costa Monteiro hodi atualiza progressu dezenvolvimentu Greater Sunrise.
Esteve Bracks atualiza katak, progressu ida hosi Greater Sunrise maka Timor-Leste (TL) ho Austrália kontrata ona kompañia Wood-Austrália ne’ebé ninia edifísiu iha Londres hodi halo estudu bá konseitu ekonómiku iha semana kotuk no tuir planu sei konklui iha tinan 2024.
Esteve Bracks konsidera reuniaun ho Primeiru-Ministru Xanana Gusmão ho Ministru Petróleu, Rekursu no Minerál pozitivu tebes tanba konsege halo diskusaun kona-bá Greater Sunrise no oinsá dezenvolve iha futuru.
“Ami hili no kontrata ona kompañia ida hodi halo estudu bá konseitu ekonómiku bá projetu Greater Sunrise. Rezultadu estudu ne’e sei fó-sai iha tinan ida-ne’e,” Esteve Barcks hateten hafoin enkontru ho Primeiru-Ministru, Kay Rala Xanana Gusmão iha Palásiu Governu, Segunda (08/04/2024).
Reprezentante espesiál Austrália ne’e dehan, hosi estudu ne’e mak bele hatene loloos projetu ne’e dezenvolve iha ne’ebé no oinsá.
Iha fulan novembru 2023, reprezentante espesiál ne’e hasoru ona Xefe Governu hodi ko’alia kona-bá estudu ne’ebé daudaun ne’e halo hela no sira defende katak, Austrália prefere halo estudu viabilidade foun bá konseitu dezenvolvimentu Greater Sunrise.
Estadu Timor-Leste liuhosi Timor GAP, E.P hola parte ona iha konsórsiu Greater Sunrise ho partisipasaun maioria reprezenta 56,56%, Woodside (operadora) 33,44% no Osaka Gas 10%.
