Tve-t Dili, 18 Abril 2024 – Prezidente Republika Jose Ramos-Horta, fó pose ba Luis Miguel Lopes de Sousa Sequeira, nu’udar Embaixadór Foun Estraordináriu no Plenipotensiáriu Repúblika Demokrátika Timor-Leste nian ba Repúblika Mosambike.
Timor-Leste no Mosambike iha relasaun istórika no kulturál hanesan eis-kolonias Portugés. Nasaun rua ne’e estabelese relasaun diplomátika iha 2002, lakleur depois Timor-Leste hetan independénsia. Sira mantein nafatin relasaun polítika amigavel, hodi hatudu apoiu ba malu ba dezenvolvimentu no esforsu sira atu harii nasaun.
Área prinsipál sira ba kontinuasaun parseria inklui edukasaun kruzada, justisa no kooperasaun jurídika, jestaun rekursu naturál sira, no servisu hamutuk hodi alkansa Objetivu Dezenvolvimentu Sustentavel ONU nian. Timor-Leste iha kompromisu atu apoia dezenvolvimentu no seguransa Mosambike nian liuhusi ligasaun fraternál espesiál hanesan nasaun sira ne’ebé ko’alia lian Portugés.
Nomeasaun Embaixadór Luis Sequeira reprezenta kompromisu ne’ebé metin ba Timor-Leste atu hasa’e no hametin liután kooperasaun bilaterál no amizade entre nasaun rua ne’e. “Hau agradese ba Prezidente Ramos-Horta no Primeiru-Ministru Kay Rala Xanana Gusmão tanba ba konfiansa atu reprezenta Governu Timor-Leste iha Mosambike,” dehan Embaixador Luis Sequeira hafoin serimónia ne’e.
Embaixadór Luis Sequeira nu’udar profisionál timoroan ida-ne’ebé iha susesu boot tebes iha área análize polítika, koordenasaun programa, kapasitasaun no fortalesimentu institusionál ba organizasaun internasionál sira hanesan Banku Dezenvolvimentu Aziátiku (ADB), Banku Mundiál, no AusAID. Iha mestradu oin-oin husi Universidade Nasionál Austrália, inklui iha Diplomasia, Asuntu Internasionál no Polítika Públika, Luis Sequeira hatudu ona kompromisu kle’an ba edukasaun no dezenvolvimentu profisionál.
Nia dezempeña knaar seniór oin-oin, inklui nu’udar Koordenadór Prinsipál ba Asisténsia Téknika ADB nian ba Bee Timor-Leste husi tinan 2021 to’o 2023, Analista Polítika ba Servisu Bee no Urbanu no Konselleiru Polítika Bee nian ba ADB, Adidu Edukasaun ba Brazil ho Ministériu Edukasaun Timor-Leste, Asesór Senior Polítika Públika ho Sekretáriu Estadu ba Haforsa Institusionál, Asesór Nasionál ba Desentralizasaun ho Banku Mundiál, no Koordenadór Senior no Pontu Fokál Jéneru ho AusAID. Fluente iha lian Tetun, Portuges, Inglés no Indonézia, Sr. Sequeira mós okupa kargu lideransa iha organizasaun desportiva sira.
Embaixadór Luis Sequeira sei aranka ba nia postu foun iha Mosambike lakleur hafoin serimónia tomada de posse ohin.
Média PR/Tve-t.
