Tve-t Dili, 18 Abril 2024 – Iha mudansa signifikante ida atu hadi’ak Timor-Leste nia dezenvolvimentu linguístika, Prezidente Republika Jose Ramos-Horta ofisialmente loke Semináriu sosializasaun ida kona-ba Edukasaun multilinguál iha Institutu Nasionál Edukasaun (INFORDEPE) iha Balide, Dili.
Semináriu ne’ebé organiza liuhusi Programa Edukasaun Multilingue husi INFORDEPE ho Ministériu Edukasaun nian, ho objetivu atu hasa’e sidadaun Timor-oan sira-nia abilidade literasia husi sira-nia moris tomak iha lian oi-oin, liuliu lian Tetun no Portuges.
Prezidente Repúblika hatete: “Domina lian sira seluk, hanesan lian ofisiál Portuges no lian inan, importante tebes ba ita-nia moris no hanesan identidade no hein katak iha tinan hirak oin mai, lian Tetun sei sai riku liután, inklui mós ita-nia lian materna sira.”
Programa edukasaun multilingue, ne’ebé sei hahú husi pre-eskolár to’o eskola nivel aas, dezeña atu fornese ba estudante sira, liuliu sira ne’ebé iha área rurál sira, atu bele iha fundasaun ne’ebé metin iha literasia no numerasaun liuhusi hanorin sira iha lian sira ne’ebé sira komprende di’ak liu. Aprosimasaun ida-ne’e, Ministra Dulce Soares hateten, sei fó dalan ba sira atu halo tranzisaun fasil liu hodi aprende lian ofisiál hanesan lian segundu.
Prezidente Ramos-Horta ko’alia mós kona-ba profesór sira ne’ebé marka prezensa, katak papél importante ne’ebé sira sei hala’o ba susesu husi inisiativa ida-ne’e. “Ho Ministra Edukasaun nia lideransa, tenke iha formasaun di’ak liu ba profesór sira, no formasaun tékniku, sientifika no ideolojika ne’ebé esensiál tebes, tanba sira mak responsavel ba ita-nia oan sira-nia edukasaun.”
Abertura programa edukasaun multilinguál ida-ne’e hanesan pasu signifikativu ida iha Timor-Leste nia esforsu atu promove sistema edukasaun ida-ne’ebé inkluzivu no ekuitativu liu, ida-ne’ebé selebra diversidade linguístika nasaun nian no fó kbiit ba sidadaun sira atu moris iha mundu ida-ne’ebé globalizadu liu.
Média PR/Tve-t.
