Tve-t Covalima, 17 Abríl 2024 – Prezidénsia Repúblika, tersa no kuarta-feira ne’e, kontinua fó apoiu sosiál ba família ne’ebé ho difisiénsia (EhD) iha Postu-Administrativu Fatululik, Fohorem, Tiliomar, Zumalai no Fatumea, Munisípiu Covalima.
Apoiu sosiál hanesan Foos, Mina ba tein, Parsél ba hahan inklui Kulsaun, oferese liu husi Asesesoria assuntu Inkluzaun Sosiál, Prezidénsia Repúblika. Apoia ne’e fó husi uma ba uma ne’ebé ema ho difisiénsia sira hela ba.
Iha nia intervensaun, Assesór Prinsipál Assuntu Inkluzaun Sosiál, Gaspar Afonso informa, “Apoiu ne’e hanesan kontinuasaun inisiativa hosi Prezidente Repúblika nian, liga ba assuntu inkluzaun sosiál atu labele husik ema ida iha kotuk no hatudu domin ba sira (EhD)”.
Gaspar Afonso informa liután, loloos la’ós de’it apoia sosiál maibé ho vizita ne’e atu haree sira-nia kondisaun moris inklui enkoraza sira no ba futuru hodi halo polítika ida atu halo atendimentu di’ák liután ba sira iha área rurál.
Ba família ema ho difisiénsia sira ne’ebé seidauk hetan apoia sosiál ne’e, reprezentante EhD iha Palásiu Prezidensiál esplika katak sei la halo diskriminisaun ba ema ida no esforsu katak ba oin sei hetan hotu apoiu sosiál ne’ebé oferese husi Prezidénsia Repúblika tanba programa ne’e mai husi inisiativa Prezidente Repúblika Ramos-Horta desde nia mandatu da-ruak iha 2022.
Entretantu, Alfredo de Araujo, Xefe Aldeia Belulik-Kraik, Suku Belulik-Leten, Postu-Administrativu Fatumea, reprezenta família ema ho difisiénsia ho matan-wen, expresa nia agradesimentu ba Xefe Estadu atuál. “Ha’u sente kontente no agradese tanba ami-nia komunidade ema ho difisiénsia sira hetan apoia husi Prezidente Repúblika”.
Antes to’o iha munisípiu Covalima, ekipa inkluzaun sosiál hala’o uluk atividade apoia sosiál iha munisípiu Bobonaro, iha Postu-Administrativu Bobonaro no Lolotoe ho totál benefisiáriu na’in 15 no loron tuir mai kontinua iha munisípiu Covalima iha Postu-administrativu Fatulik, Fohorem, Tiliomar no Fatumea hamutuk benefisiáriu na’in 44 inklui Zumalai iha família 1 sai benefisiáriu nune’e totál husi munisípiu Bobonaro no Covalima, iha benefisiáriu hamutuk nain 60 .
Média PR/Tve-t.
