Tve-t,Dili, 28 Maiu 2024 – Prezidente Rwpublika Jose Ramos-Horta kondekora Orden Honorifika Timor-Leste nian iha kategoria Kolar ba Embaixadór Repúblika Federativa Brazil nian ne’ebé rezidente iha Timor-Leste, Sr. Maurício Medeiros de Assis, hodi rekoñese ninia dedikasaun ezemplár no susesu boot durante nia misaun diplomátika tinan tolu iha Timor-Leste. Serimónia ne’e hala’o iha Palásiu Prezidensiál Nicolau Lobato.
Embaixadór Assis iha ona karreira tinan 25 iha Servisu Estranjeiru Brazil nian, ne’ebé servisu iha papél oioin iha sede Ministéiu nian iha Brazilia no mós iha misaun diplomátika Brazil nian sira iha Madrid, Sydney, Hanoi no Shanghai, molok hala’o nia knaar nu’udar Embaixadór ba Timor-Leste iha Dezembru 2020. Iha nia lideransa, Brazil fó ona apoiu ne’ebé boot ba Timor-Leste liu husi akordu kooperasaun hamutuk 23 ne’ebé eziste ona ne’ebé mak hanesan edukasaun, administrasaun públika, justisa, defeza, seguransa, formasaun profisionál, saúde no seluk tan. Liu-liu, Embaixadór Assis fasilita estabelesimentu projetu kooperasaun bilaterál foun ho instituisaun Timoroan sira no hadi’a fali inisiativa sira iha pasadu.
Iha tinan 2023, Brazil no Timor-Leste asina ona ajusta komplementar ba Akordu Kooperasaun 2002 nian iha Edukasaun kona-ba kriasaun Programa Mestradu iha Edukasaun UNTL nian. Hodi kumpre ezijénsia husi Ministru Edukasaun, Dulce de Jesus Soares, Embaixadór Assis organiza projetu pilotu ida ho objetivu atu fó formasaun ba profesór sira husi eskola públiku téknika no vokasionál sira iha Dili no munisípiu sira. Embaixadór ne’e mós sai nu’udar apoiante ida-ne’ebé forte ba “Operasaun Maubere”, programa formasaun militár ida-ne’ebé fornese husi Forsa Armada Brazil ba Polísia Militár Falintil nian. Nia mós ajuda reforsa kooperasaun téknika ho Parlamentu Nasional Timor-Leste. Lakleur tan Brazil sei fila fali hodi fó kbiit ba SENAI Profisionál no Sentru Vokasionál Becora nian no fornese asisténsia téknika ba agrikultór sira eskala ki’ik iha Agroekolojia.
“Embaixadór Maurício nu’udar Timor-Leste nia belun ne’ebé loos, hodi hala’o papél fundamentál ida hodi promove ita-nia nasaun nia interese no promove amizade entre ita-nia povu sira”, afirma Prezidente Ramos-Horta. Ninia profisionalizmu, dedikasaun no haka’as an atu haburas ita-nia relasaun bilaterál mak inspirasaun no merese hetan onra boot ida-ne’e.”
Relasaun diplomátika entre Timor-Leste no Brazil estabelese iha loron 20 fulan-maiu tinan 2002 hafoin Timor-Leste restaura independénsia. Timor-Leste kontinua fó apoiu ba kandidatura Brazil nian iha organizasaun oioin ONU no internasionál durante tinan barak. Prezidente Ramos-Horta hato’o nia agradesimentu ba apoiu tomak Brazil nian mai Timor-Leste.
