Tve-t,Dili (20/06/2024) – Primeiru-Ministru (PM), Kay Rala Xanana Gusmão selebra loron moris nian bá dala-78 (20 Juñu 1946-20 Juñu 2024) ho misa agradesimentu, iha Parókia Nossa Senhora Imaculada da Conceição Balide, kinta (20/06).
Misa agredesimentu ne’e prezide hosi Vigáriu Jerál Arkedioseze Metropolitana Díli, Padre Graciano Santos Barros ho konselebrante sira mak hanesan Pároku Balide, Padre Angelo Salsinha, Padre Venâncio Pinto SJ, Padre Cirilio dos Santos Maia, Padre Francisco Barreto no mós Padre na’in-rua ne’ebé foin selebra bodas de prata Saserdotál nian iha semana kotuk maka atuál Vigáriu Jerál Dioseze Maliana, Padre Lúcio de Deus ho atuál Konsilleiru Conselho Consultivo Fundo Petrolífero (CCFP), Padre Mouzinho Perreira Lopez.
Padre selebrante iha orasaun, hasa’e agradese bá Maromak, husu grasa saúde, moris naruk, matenek, no sabedoria bá Primeiru Ministru Kay Rala Xanana Gusmão atu bele kontinua lori nasaun Timor-Leste no povu ida-ne’e bá moris diak no prósperu.
Misa agradesimentu ne’e monu iha kinta-feira 110 semana tempu komún, ho primeira leitura foti hosi Livru Ben Sirá 48:1-15, no Evanjellu hosi S. Mateus 6:7-15.
Padre selebrante foti Tema omília: “Bainhira imi reza, keta ko’alia barak”. Tanba ne’e, mensajen Evanjélika ohin nian fó hanoin atu bainhira halo orasaun, tenke mai ho sentidu gratidaun, mai hosi laran, mai ho fiar hanesan orasaun ne’ebé Jesus rasik hanorin “Ami Aman iha Lalehan”.
Padre ne’e subliña, orasaun Ami Aman mak sai referénsia bá ema fiar-na’in sira, nune’e ohin iha misa ida ne’e hasa’e orasaun ho sentidu gratidaun hamutuk ho Primeiru-Ministru, Kay Rala Xanana Gusmão bá matenek, saúde, moris naruk atu bele hamutuk lori rai no povu ne’e ba oin nafatin.
Iha biban ne’e, Primeiru Ministru Xanana Gusmão agradese bá ema hotu-hotu ne’ebé mak reza bá nia iha loron espesiál ida-ne’e.
“Ha’u hakarak agradese de’it bá Amu selebrante no konselebrante sira. Agradese mós bá maluk sira hotu ne’ebé mak marka prezensa hodi hamutuk ho ha’u iha misa agradesimentu ida-ne’e. Obrigadu barak,” Xanana Gusmão hateten.
Molok bensaun finál iha misa ne’e nia rohan, Padre Lúcio de Deus agradese mós bá ema hotu-hotu ne’ebé bá mak akompaña ona sira na’in-rua Padre Mouzinho Perreira Lopez iha sira ninia vida Saserdotál ne’ebé kompleta ona tinan 25 iha semana kotuk, liu-hosi motivasaun no orasaun, hato’o mós parabéns bá Primeiru Ministru ne’ebé mak ohin halo tinan moris nian bá dala-78, dejeza saúde di’ak nafatin atu bele kontinua lori povu no rai ne’e bá moris di’ak tuir Maromak nia hakarak.
“Ha’u lori Amu Bispu sira nia fatin, nai-lulik sira nia fatin hato’o parabéns bá Primeiru-Ministru Kay Rala Xanana Gusmão ne’ebé mak selebra tinan moris nian. Ita espera ho tinan aumenta, bele santu liu-tán, forte liu-tán no iha liu tán sabedoria,” Padre Lúcio hateten.
Partisipa iha misa agradesimentu ne’e, membru IX Governu Konstitusionál, membru Parlamentu Nasionál (PN), Autoridade Polísia Nasionál Timor-Leste (PNTL) no sarani sira.
