Tve-t Dili, Kinta feira(27/06/2024) – Konsellu Ministru hala’o sorumutu iha Palasiu Governu Dili, Ministra finansas Santina Rodrigues F. Viegas Cardoso aprejenta planu ne’ebe mak sei implementa iha tinan lima iha Ministeriu Financas.
Planu ne’e ho objetivu atu aumenta kapasidade Ministériu nian hodi fó apoiu ba instituisaun estatál sira seluk iha jestaun efisiente finansas públikas nian. Hahú hosi ninia kriasaun durante administrasaun ONU nian iha tinan 2001, Ministériu Finansas Timor-Leste dezenvolve ona ninia kapasidade hodi apoia instituisaun estatál sira seluk iha jestaun finansas públikas.
Planu Tinan-Lima ne’e la reflete de’it progresu sira ne’ebé alkansa ona, maibé ko’alia mós kona-ba dezafiu sira ne’ebé mosu hanesan rekuperasaun pós-pandemia COVID-19 no impaktu husi dezastre klimátiku, ne’ebé foka-liu ba nesesidade atu hametin sistema finanseiru públiku hodi promove dezenvolvimentu sustentável no reziliénsia ekonómika iha Timor-Leste.
Ikusliu, Ministra Finansas, Santina José Rodrigues F. Viegas Cardoso, aprezenta kalendáriu reuniaun Komité Revizaun Orsamentál nian, iha ámbitu preparasaun Orsamentu Jerál Estadu ba tinan 2025. Reuniaun ne’e sei hahú hosi loron 12 to’o 17 fulan-agostu tinan 2024.
