Tve-t Atsabe, 23 Jullu 2024 – Prezidénsia Repúblika liu husi Unidade Servisu Sosiedade Sivil no Asuntu Sosiál (SSSAS) kontinua Halo asaun Karidade ba família vulnerável iha Suku Lação, Obulo no Laubono-Sirui, postu administrativu Atsabe Munisípiu Ermera.
Autoridade lokál, Abrão da Conceição agradese ba Prezidente Repúblika liu husi Unidade Servisu Sosiedade Sivil no Asuntu Sosiál bele konsidera sira-nia pedidu hodi tulun ona sira-nia komunidade liu-liu família vulneravel ne’ebé identifika iha suku refere. “Obrigadu na’i Prezidente Repúblika liu husi nia Unidade Servisu Sosiedade Sivil no Asuntu Sosiál hdi fahe hahan ruma mai ami-nia komunidade atu sira bele aguenta ba loron balun nian” hateten Xefe Suku Lação, Abrão da Conceição.
Entretantu Xefe Suku Obulo hamutuk ho nia komunidade sira hato’o mós agradesimentu ba Xefe Estadu liu husi unidade SSSAS bele tulun ona sira-nia komunidade kbi’it la’ek ne’ebé dalaruma susar asesu ba merkadu tanba kondisaun estrada la-di’ak.
“Ami-nia kondisaun iha Obolu ne’e hanesan Señor sira haree, ami iha kedas área rurál no susar asesu ba Merkadu iha postu, liu-liu atu fa’an ami-nia produtu mós ladi’ak tanba konfisaun dalan. Tan ne’e ami agradese no Ami hein katak ba oin sei apoiu nafatin”, hateten Xefe Suku Obulo Arquemino da Silva. Líder Komunitáriu ne’e mós husu ba Prezidénsia Repúblika atu apoiu tan material instrumentál balun hanesan orgaun atu sira bele uza ba anima atividade pastorál no animasaun iha suku nia laran.
Remata fahe sasan iha suku Obulo, loron tuir mai ekipa Prezidénsia Repúblika kontinua fahe nesesidade bázika ba família kbi’it laek sira iha Suku Laubuno-Sirui. Totál benefisiariu ne’ebé mai simu hamutuk-46 mai husi Aldeia-3 hanesan, Biabote, Purugua no Sirui.
Total Komunidade husi Suku Laubuno hamutuk-160 resin, Asesibilidade ba Estrada liga ba aldeia sira a’at tebes no aldeia Purugua rasik to’o agra seidauk asesu ba eletrisidade.
Komunidade husi Aldeia Sirui mos barak mak hela iha Rai Fehan (tetuk) no dook husi Postu, sira nia moris depedensia ba agrikuktura hanesan Natár no produtu lokál sira seluk, maibé tanba Estrada liga entre Aldeia ba Suku no husi Suku ba Postu ho kondisaun a’at, difikulta sira atu asesu ba merkadória.
Iha okaziaun ne’e, komunidade sira husu Governu atu apoiu traktór ba sira nune’e sira bele utiliza fila rai no uza ba halai-Natár. Ho prezensa husi Unidade Sosiedade Sivíl no apoia sosiál nian ne’e sira husu atu tatoli hela ba Xefe Estadu José Ramos-Horta nune’e hato’o mos ba Governu liu-liu Ministériu Relevante.
