Palásiu Prezidénsiál Nicolau Lobato, 10 Outubru 2023
Embaxadór Timor-Leste ba Brunei Darussalam, Abel Guterres, hamutuk ho investór hosi nasaun ne’e, hasoru Prezidente Repúblika J. Ramos-Horta hodi fó informasaun relevante kona-ba Vizita Estadu ne’ebé Xefe Estadu sei halo ba Brunei iha fulan oin, no planu investimentu kompania ‘Stratacom Global Sdn Bhd’ mai Timor-Leste.
‘’Iha sorumutu ne’e mós ko’alia kona-ba sesaun balu ne’ebé sei halo durante vizita, iha ne’ebé Prezidente sei asina akordu ida entre Timor-Leste no Brunei kona-ba oportunidade timoroan atu bele ba servisu iha Brunei’’, esplika Embaixadór Abel Guterres iha nia Intervista.
Aleinde ne’e iha mós diskusaun ho reprezentante kompania Stratacom Global hosi Brunei ne’ebé sei mai halo investimentu iha Timor-Leste liu-liu iha Dili no Baucau ba area turizmu. ‘’Agora sei iha faze preparasaun ba akordu molok implementa’’, deklara Embaxadór Abel Guterres.
Prezidente Repúblika agradese ba apoiu hosi Brunei ho inisiativa hirak ne’e hodi kontribui ba dezenvolvimentu Timor-Leste.
TVE & Mídia PR
