Tve-t Liquisa, 4 Abril 2024 – Prezidente Repúblika Jose Ramos-Horta, liuhusi Servisu Sosiedade Sivíl no Asuntu Sosiál Prezidénsia Repúblika, fó ona apoiu importante ba família oan-kiak ida-ne’ebé vulneravel iha Alede Terlau, Suku Ulmera. Distribuisaun asisténsia ne’e inklui nesesidade báziku sira hanesan foos, mina te’in, kulsaun, no materiál eskola ba família membru na’in sia ne’ebé moris mesak.
Distribuisaun ne’e partisipa mós husi Adelino Ribeiro, Xefe Aldeia Terlau, ne’ebé hato’o nia agradesimentu ba Prezidente Repúblika ba apoiu direta ne’ebé fó ba família. Ribeiro hateten katak presiza ajuda tan, liuliu atu harii uma ida-ne’ebé di’ak, tanba família nia hela-fatin agora daudauk ladún iha kondisaun. Nia mós subliña importánsia atu apoia edukasaun ba membru família sira ne’e nia estudu.
Reprezentante família ne’ebé simu apoiu, Bonifacio Nunes hato’o nia agradesimentu boot ba asisténsia ne’ebé Prezidensia fó, rekoñese katak maske apoiu ne’e ki’ik, maibé importante tebes atu sustenta família nia nesesidade loroloron nian. Nunes hatete katak nia hakarak atu kontinua nia edukasaun no hakarak atu nia maun-alin sira mós bele hetan oportunidade hanesan.
Inisiativa Prezidénsia nian subliña ninia kompromisu atu responde ba komunidade vulneravel sira-nia nesesidade no asegura asesu ba nesesidade báziku no oportunidade edukasaun. Liuhusi ajuda hirak ne’e, espera bele hadi’ak sira-nia kondisaun moris no kria dalan ba futuru ne’ebé di’ak liu.
Média PR/ TVE.
